ភ្នំពេញ ៖ រដ្ឋមន្ត្រីក្រសួងសុខាភិបាលលោកសាស្ត្រចារ្យបណ្ឌិត ម៉ម ប៊ុនហេង នៅថ្ងៃសុក្រទី១៤ ខែឧសភា ឆ្នាំ២០២១ បានស្នើដល់អភិបាលរាជធានី-ខេត្តទាំងអស់សុំពង្រឹងបន្ថែមវិធានការទប់ស្កាត់ការរាតត្បាតជំងឺកូវីដ-១៩ នៅមូលដ្ឋានរាជធានី-ខេត្ត។

លោកសាស្ត្រចារ្យបណ្ឌិត ម៉ម ប៊ុនហេង ថាការដាក់វិធានការបិទខ្ទប់នៅភូមិសាស្ត្ររាជធានីភ្នំពេញនិងក្រុងតាខ្មៅនៃខេត្តកណ្តាល គឺជាមេរៀនបទពិសោធន៍ដែលគួរត្រូវបានដកស្រង់ដើម្បីប្រតិបត្តិនៅតាមមូលដ្ឋានរបស់ខ្លួនទៅតាមស្ថានភាពជាក់ស្តែង។ ទន្ទឹមគ្នានេះ ត្រូវបន្តពង្រឹងការអនុវត្តច្បាប់វិធានការសុខាភិបាល និងវិធានការរដ្ឋបាលដើម្បីទប់ស្កាត់ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀតឱ្យមានប្រសិទ្ធភាពខ្ពស់ព្រមទាំងលើកកម្ពស់ការយល់ដឹងអំពីវិធានការបង្ការជំងឺកូវីដ-១៩ឱ្យកាន់តែស៊ីជម្រៅទៅដល់បុគ្គលគ្រួសារនិងសហគមន៍៕